हे जीवन
सुंदर आहे !
नितळ निळाई आकाशाची अन्‌ क्षितिजाची लाली
दंवात भिजल्या वाटेवरती किरणांची रांगोळी
( अहो, आता विसरा हे सगळं,
इथं इमारतींच्या जंगलातला वनवास
त्यातून दिसणारं टीचभर आकाश
आणि गर्दीत घुसमटलेले रस्त्यांचे श्वास )
कोठेही जा अवतीभवतीं निसर्ग एकच आहे
हे जीवन सुंदर आहे !
पानांमधली सळसळ हिरवी अन्‌ किलबील पक्षांची
झुळझुळ पाणी, वेळुमधुनी खुळी शीळ वार्‍याची
( इथं गाणं लोकलचं,
पाणी तुंबलेल्या नळाचं
आणि वारं डोक्यावर गरगरणार्‍या पंख्यांचं )
इथेतिथे संगीत अनामिक एकच घुमते आहे
हे जीवन सुंदर आहे !
पाऊस झिमझिमणारा आणि पाऊस कोसळणारा
टपटप पागोळ्यांतून अपुल्या ओंजळीत येणारा
( पाऊस म्हणजे रेनकोटचं ओझं
कपड्यांचा सत्यनाश आणि सर्दीला निमंत्रण )
जगण्यावरचे प्रेम जणु हे धुंद बरसते आहे
हे जीवन सुंदर आहे !
No comments:
Post a Comment